《A stupid flu》
小時候的意佬都係怕怕醜醜，而佢身後嘅公公每朝都起身食過早餐後，意媽就帶公公到車房門前乘涼。孫仔學騎馬，公公都看得樂此不疲。意佬久唔久都會望吓呢張相，每次睇住張相，佢亦會講佢同公公嘅故事俾我聽。
二次大戰後，意佬公公的一代主要都是靠管理農場或工廠打工為生。每逢月尾出糧日，婆婆要求公公將份糧上繳中央作為家用，而公公寧願將啲錢攝喺佢頂紳士帽裡面都唔肯交出嚟。一對戰前戀人動口繼而動手，婆婆開始搜身，觸怒了公公，激氣得一手將整個月人工向火爐方向撤過去！婆婆被激到眼都反白，兩伙子圍住飯枱、梳化、孫仔孫女你追我逐……家庭倫理喜劇就此誕生🙈
身形魁梧六尺二高嘅公公由於隻手大過梳蕉，趕出門時總係將啲恤衫鈕扣錯哂。意佬話公公脾氣大，有時忟得滯扯爛件衫😳婆婆唔想每日買一件恤衫咁折墮，於是乎𥄫實佢，一但公公開始姨姨蛾蛾, 婆婆就撲過去幫佢扣衫鈕，一扣就扣了半個世紀。
直到……婆婆離開了，公公從此變得獨僻。任佢女兒(意媽)點樣幫佢扣齊衫鈕，佢總係唔滿意。未幾，公公中埋風，往日大隻如雷神的公公威風不再，要靠意媽每朝扶佢起身落樓梯出外吸吸新鮮空氣。
然後11月的San Martino (聖馬田日)，有啲似西方萬聖節，小朋友們都紮紮跳的提著自製燈籠逐家逐戶敲門去攞糖果。那時候只有6，7歲的小意佬，南瓜燈籠被朋友仔爛咗，於是呱呱大喊跑返屋企揾公公。房內的公公剛剛露出半邊屁股，原來醫生正在應診幫公公打流感針。未懂性嘅小意佬冇理咁多一殼眼淚咁衝埋去公公的懷抱申冤，沉默以久的公公竟然褲都未拉好就急不及待想為孫仔出返啖氣，意媽襟住公公話：「你咪周圍走啦，你仲感冒緊！」醫生再贈一句：「哦，冇乜嘢嘅，it's just a stupid flu。」誰知，呢個stupid flu，一個普通到不得了嘅流感將公公帶走了。就係咁，婆婆走咗冇幾耐之後，公公好快都走埋。
愛的大量之大，係足以令人當其失去摰愛後，連一個stupid flu都敵不過。
我們要振作，好好守護身邊的每一個人。
我們要堅強，因為身邊的任何一個人，都會需要我們去守護。
愛，唔可以當藥食；
但愛，可讓我們感動過；
因為愛，我們還能充實地過著混賬的一天。
#讓愛蔓延
#香港人加油
#在武漢的武漢人加油
#全球人類加油
#因為人間有愛
#LoveCanBattleEverything
P.S. 我衷心希望武漢的病人好返，但選擇逃離的，請盡地球人責任返去自己的家鄉醫病
Search